Gen 15 | NdeIBE | STEP | Ngemva kwalokho ilizwi likaJehova leza ku-Abhrama ngombono: “Ungesabi, Abhrama. Ngiyisihlangu sakho, umvuzo wakho omkhulu kakhulu.”

Genesis 15

Isivumelwano sikaNkulunkulu lo-Abhrama

1 Ngemva kwalokho ilizwi likaJehova leza ku-Abhrama ngombono: “Ungesabi, Abhrama. Ngiyisihlangu sakho, umvuzo wakho omkhulu kakhulu.”

2 Kodwa u-Abhrama wathi, “O Jehova Wobukhosi, ungangiphani njengoba ngilokhu ngingelamntwana, ilifa lami lizadliwa ngu-Eliyezeri waseDamaseko na?” 3 U-Abhrama wathi njalo, “Awungiphanga bantwana; ngakho inceku endlini yami izakuba yindlalifa yami.”

4 Kwathi ilizwi likaJehova lafika kuye lathi: “Umuntu lo kayikuba yindlalifa yakho, kodwa indodana ephuma kowakho umzimba izakuba yindlalifa yakho.” 5 Wamkhuphela phandle wathi, “Khangela emkhathini ubale izinkanyezi – nxa ulamandla okuzibala.” Wasesithi kuye, “Sizakuba njalo isizukulwane sakho.”

6 U-Abhrama wamkholwa uJehova, lokho kwabalwa kuye njengokulunga.

7 Waphinda wathi kuye, “NginguJehova owakususa e-Uri lamaKhaladiya ukuzakupha lelilizwe ukuthi libe ngelakho.”

8 Kodwa u-Abhrama wathi, “O Jehova Wobukhosi, ngingazi kanjani ukuthi lizakuba ngelami na?”

9 Yikho uJehova wathi kuye, “Ngilethela ithokazi, lesibhuzikazi lenqama, konke kuleminyaka emithathu, kanye lejuba lenkwilimba esencinyane.”

10 U-Abhrama wakuletha konke lokhu kuye, yilokho wakudabula phakathi ngakunye wakuhlela izingxenye zakho zakhangelana; kodwa izinyoni kazidabulanga phakathi.

11 Izinyoni ezidla inyama zehlela ezidunjini, kodwa u-Abhrama wazixotsha.

12 Kwathi ilanga selitshona, u-Abhrama wathathwa yibuthongo obukhulu, wehlelwa ngumnyama owesabekayo. 13 UJehova wasesithi kuye, “Yazi ngempela ukuthi izizukulwane zakho zizakuba ngabezizwe elizweni elingasilo labo, njalo bazagqilazwa baphathwe kubi okweminyaka engamakhulu amane. 14 Kodwa ngizasijezisa lesosizwe abazasikhonza njengezigqili, kuthi muva baphume belemfuyo enkulu kakhulu. 15 Kodwa wena, uzakuya kubokhokho bakho ngokuthula, ungcwatshwe usukhulile kakhulu.

16 Isizukulwane sakho sesine sizabuya lapha, ngoba isono sama-Amori kasikafiki ekucineni.”

17 Kwathi ilanga selitshonile, ubumnyama sebufikile, kwavela imbiza yomlilo ethunqa intuthu ilobhaqa olulavuzayo, yadabula phakathi kwezixha zenyama. 18 Ngalelolanga uJehova wenza isivumelwano lo-Abhrama wathi, “Ilizwe leli ngilipha izizukulwane zakho, kusukela emfuleni waseGibhithe kusiyafika emfuleni omkhulu, iYufrathe – 19 ilizwe lamaKhenani, lamaKhenizi, lamaKhadimoni, 20 lamaHithi, lamaPherizi, lama-Refayi, 21 lama-Amori, lamaKhenani, lamaGirigashi kanye lamaJebusi.